曼聯中場馬恩奧上仗英超踢到補時，個人表演射入靚波，協助紅魔鬼絕殺狼隊，技驚四座，人氣亦急升，根據英國《泰晤士報》報道，加納足總已經派人遊說呢位喺英國出世嘅18歲新星「認祖歸宗」改為代表加納國家隊，意味英格蘭隨時會失去1位天才猛將。
馬恩奧嘅父母係加納人，佢喺英格蘭史托港出世，有資格選擇代表英格蘭或者加納國家隊，呢位全能戰士過去曾經係英格蘭U17、U18、U19上陣，但仲未晉身大國腳。據悉英格蘭主帥修夫基上年年底曾經同馬恩奧見面，希望佢選擇代表「三獅兵團」，但修夫基並冇承諾會徵召佢入國家隊。
加納近年積極招攬「海外兵團」，曾經遊說阿仙奴前鋒尼基迪亞代表呢支非洲勁旅，但未能成功，今次又瞄準馬恩奧。加納足總董事局成員艾比話：「馬恩奧係1位極具天賦嘅球員，我哋會繼續遊說及吸引佢選擇為加納披甲。」英國輿論認為，修夫基應該徵召馬恩奧參加今屆歐國盃，以免人才流失。