今屆世界盃H組球隊加納未開波，先「擺烏龍」?根據阿根廷《奧萊報》爆料，呢支非洲球隊飛赴主辦國卡塔爾，但忘記帶球衣，需要另外空運去當地，未必能夠趕及球隊11月25日凌晨首場分組賽對葡萄牙之前運抵，面臨冇波衫着嘅尷尬局面。
報道指加納工作人員可能未出發先興奮，將全隊球衣遺留喺本土，加納足總需要通過郵政服務，將球衣送往卡塔爾，但當地郵政服務效率低，擔心波衫未能及時送到球隊手上。
不過，加納國家隊發言人之後作出否認，指謠言太可笑、太荒謬，因為球隊仲未出發去卡塔爾，根本唔存在冇帶球衣嘅可能性。加納同組對手有葡萄牙、南韓、烏拉圭。